上海老底子每天呈送精彩文章一组
打开尘封的记忆，寻觅往昔的岁月
叙上海老底子事忆上海老底子人
诉上海老底子情
漫谈上海个阴阳路
作者：周力
来源：老周望野眼
沪语改写、讲述：边秦翌
审核推荐：丁迪蒙
编辑：王乙其
板起手节头数一数，今朝是蹲勒屋里个第31天，算“满月”了。三月份以来，上海人天天拨“阴”“阳”二个字纠缠，一歇歇么核酸了，一歇歇么抗原了，胡咙口鼻头管勿晓得拨捅了多少趟，阴，当然迓迓叫开心，阳了，麻烦就一大堆。每日天除脱三顿饭，就是搭朋友勒网浪向茄山河，勿晓得啥人讲起：上海个马路，带“阳”字个邪气多，带“阴”字个老老少，告咾搿趟疫情来势汹汹，“阴风”压勿牢“阳气”呀！
虽然是只茶余饭后个笑话，但是还真是有点道理个。
中国传统文化，世间万物侪有阴阳之道，天地、日月、昼夜、寒暑、君臣、男女、动静、开合……阳是主动个，阴是被动个，阳主生，阴主杀。所以起名字个辰光，大家当然要“向阳而生”，勿欢喜“柳影花阴”。大致想了想，上海有得“阳”字个马路有：宾阳路、波阳路、丹阳路、汉阳路（东汉阳路）、汾阳路、岳阳路、凤阳路、高阳路、谷阳路、海阳路、华阳路、济阳路、昆阳路、龙阳路、罗阳路、南阳路、欧阳路、平阳路、曲阳路、太阳山路、旬阳路、阳城路、阳曲路、阳泉路、枣阳路、正阳路……作兴还有遗漏，读者朋友可以帮忙补充补充。搿还是“明阳”，像张杨路、古羊路咾啥“暗阳”还没算勒里向。市区东北部有长阳路搭双阳路，齐巧两条马路还是相交个。
相比之下，带“阴”字个路名，印象当中只有江阴路、江阴街、东江阴街、淮阴路、山阴路、汉阴路、华阴路……其他好像呒没了。南市有条林荫路，按照现在个规范写法，应该写成功“林阴路”，齐巧林荫路搭江阴街是相交个，作兴可以抵充长阳路搭双阳路“三阳开泰”个阳气。
目前，上海虽然有点阳盛阴衰，但是阴阳之道，对立、相冲，还有转换。相信否极泰来个日脚勿会忒远，所谓以“阴阳”名字命名个道路，只必过是疫情期间个笑谈而已。
除脱以上罗列个路名，上海还有一些消失个地名，譬如，现在个瑞金南路斜土路口，原名“平阴桥”，晓得迭个名字个人勿多了。我小辰光乘89路公交车，伊个辰光还有售票员，报站名：“平阴桥到了，下车请准备”，一直以为是“平行桥”。后首来再晓得，搿是只看上去有点吓人倒怪个名字。
现在个瑞金南路，老底子是条南北向流入*浦江个小河浜，名日晖港。平阴桥东西向，建于-年间，原来是木梁木板结构，抗日战争当中遭到毁坏，年重修，年再次修缮，改为钢筋混凝土桥。平阴桥迭个名字到底哪能介来个？呒有明确个讲法。联想到解放前日晖港沿岸是空地、塘潭搭仔村落，里向还有荒坟野冢，拨桥起名字个辰光，讲勿定有点想法要克制克制阴气伐。
解放之后，斜土路交通繁忙，平阴桥两旁边造了厂房搭仔居民区，桥东搿搭个荒地浪造了卢湾中学，老底子星星点点个墓地慢慢叫消失了，只有得“平阴桥”迭个名字还勒海。89路公交车用迭个站名一直用到新世纪，搿歇，已经用“斜土路瑞金南路”新名字取代了。
今朝写搿些文字，希望还“阴”勒海个朋友坚持下去，“阳”了个朋友也覅担心，“造化钟神秀，阴阳割昏晓”，快点转阴，恢复正常生活。祝愿感染疫病个朋友早日康复，所有勒勒煎熬当中等待个人，大家侪平安康健，祝愿世界和平。
作者：周力
讲述：边秦翌
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
来源：“海上梦叠”